E fundashon Pro Monumento, ProMo, a keda fundá na aprel 1993 riba inisiativa partikular. Motibu direkto pa esaki tabata e menasa ku lo basha abou e teatronan West-End i Cinelandia.

ProMo ta un fundashon independiente ku tin komo ophetivo mantenshon i kuido di edifisionan históriko na Kòrsou den sentido mas amplio di palabra. ProMo ta trata na logra esaki lantando su bos di guardian ora monumentonan ta kore peliger di disparsé òf sufri otro tipo di daño. Banda di su lucha pa mantenshon di edifisio históriko, ProMo ta organisá vários aktividat pa hasi pueblo di Kòrsou mas konsiente di nos patrimonio históriko. Asina ProMo ta organisá charla i dia di Monumento Habri, ku a hasi e fundashon hopi konosí.