Fundashon Pro Monumento - Curacao - notisia - KOMUNIKADO DI PRENSA: Península di Caracasbaai

Shete organisashon no gubernamental a pidi Bestuurscollege den un karta pa desisití di desaroyo na gran eskala riba e península di Caracasbaai, i mantené komo zona bèrdè pa rekreashon di poblashon lokal i turistanan. Ta trata aki di Fundashon Pro Monumento (ProMo), Carmabi, Fundashon Desendientenan di Almirante P.L. Brion, National Archeological Anthropological Memory Management (NAAM), Reef Care, Stichting Uniek Curacao i Stichting Monumentenzorg Curacao.
Nan a proponé Bestuurscollege pa ahustá e Eilandelijk Ontwikkelings Plan (EOP) di tal manera ku ta konservá balor di e paisahe di e península di Caracasbaai i su balor biológiko marino, históriko (arkitektóniko) i arkeológiko. Por logra esaki kambiando destinashon di e parti wèst di e península, ku aktualmente ta destiná komo zona turístiko, pa “zona di konservashon”. E idea ta pa un solo instante manehá enter e area i ku akseso ta keda kompletamente liber pa rekreashon, tantu na Baya komo otro kaminda (playa, kaminda pa kore baiskel i kana èts. èts).

Na 1995, ora a fiha e Eilandelijk Ontwikkelings Plan, gobièrnu a destiná e parti ost di e península komo area di konservashon. E parti wèst, a lo largu di Caracasbaai, a haña un destinashon turístiko, kaminda lo por a konstrui entre otro hotèl grandi. Desaroyo di e península sinembargo no a kristalisá, kontrali na e areanan serkano. Pesei e península te ainda ta un area relativamente virgen, bèrdè i habrí entre e area residensial i turístiko di Jan Thiel, ku ta den pleno desaroyo, e playanan hopi frekuentá di Caracasbaai, Spaanse Water ku su hopi botonan i tantísimo kasnan di biba i e area di Santa Barbara, kaminda un desaroyo di eskala mayó komo zona turístiko ta tumando lugá. Sinembargo e preshon pa “desaroyá” e península tambe ta grandi aktualmente.

Dor ku a habri e península pa públiko algun aña pasá e area a konosé un desaroyo rápido, ounke instrukturá, komo un area di rekreashon variá, pa kual aparentemente tin nesesidat na e parti aki di Kòrsou. Esaki ta un di e poko lugánan kaminda e paisahe habrí i laman ainda ta aksesibel sin paga entrada pa pueblo di Kòrsou. Si pèrmiti un desaroyo turístiko di e area ku hotél, parke di bungalow òf hasta un terminal krusero, e area sin duda lo bira totalmente òf parsialmente inaksesibel pa e poblashon lokal. Algu ku den e tempu aki no ta aseptabel mas i ku na e momentonan aki ta biba mashá den pueblo, awor ku diskushonnan riba aksesibilidat di nos kostanan a bolbe lanta kabés.

Kambio di destinashon di e península pa un area di konservashon no ta stroba desaroyo di turismo, pero hustamente ta fomentá un desaroyo duradero. Pasobra “turismo” ta mas ku solamente konstrukshon di hotèl i apartamento, pero tambe oferta di un diversidat di rekreashon, manera un area pa kana i kore baiskel pa uso di tantu hendenan lokal komo turista i kaminda por tene aktividat edukativo tambe. Por mantené rekreashon akuátiko na Baya Beach i riba sobrá tereno di e península tambe por krea fasilidat pa fin rekreativo dirigí na eskala chikí pa tantu hendenan lokal komo turista.

E organisashonnan menshoná ta konvensí ku turismo duradero ta solamente posibel si Kòrsou distingui su mes for di otro destinashonnan den Karibe ku un produkto turístiko variá. Esaki ta posibel ofresiendo un paisahe i fasilidatnan históriko kultural ku no ta (por) ofresé otro kaminda den Karibe.
E península ta úniko den nos region ku su flora i founa speshal, hopi lugá di brui pa para i piská, su monumentonan históriko (Fort Beekenburg, e edifisio di Quarantaine i e edifisio pegá ku Baya Beach) i no lubidá e flora i founa ekstraordinario den e awanan ku ta rondoná e area aki. E península di Caracasbaai por “make the Real Difference” basta e mantené su ambiente outéntiko.

Algun aña pasá a designá e edifisionan riba e península komo monumento, pero e protekshon ku a haña no ta sufisiente pa mantené e konteksto históriko di e komplehonan si konstrui edifisionan turístiko riba un eskala grandi riba e península.

E organisashonnan menshoná ta haña ku mester revisá e vishon di desaroyo di e península di Caracasbaai di añanan ‘90 i ku esaki ta rekerí un diskushon sosial amplio.
Nan ta di opinion ku mester kambia e destinashon di e península di Caracasbaai pa un area di konservashon.